Era sch'ils sigls, la sveltezza ed ils saltos han fatg star stut la glieud, restan ils campiunadis mundials da freestyle en l'Engiadin’Ota era en memoria pervia da las cifras cotschnas. Sco emprim avevi num che l'eveniment custia 13 milliuns francs – questa summa è dentant adina puspè s'augmentada. Curt avant l'occurrenza, il schaner 2025 han ils organisaturs discurrì d’in budget da 22 milliuns francs. Avant l'event han ins dentant era gia fatg quint cun in deficit da 1,2 milliuns francs. Ils custs ston las vischnancas da l’Engiadin’Ota, il chantun, la Confederaziun, la FIS ed ils sponsurs purtar.
L’istorgia da las finanzas n'era dentant anc betg scritta a fin. Per restar liquid ha il comité d’organisaziun dals campiunadis mundials dumandà la vischnanca da San Murezzan per ina squitta finanziala da dus milliuns francs. Quai cun in credit transitoric.
Intgins mais suenter ils campiunadis mundials han las cifras provisoricas mussà in deficit da 2 enfin 2,5 milliuns francs. Motiv sajan differentas chaussas ch'èn betg idas tenor plan:
- Memia pauca naiv al cumenzament: ils organisaturs han stuì producir blera naiv, quai ch'haja custà. Suenter avevan els memia blera naiv, ch'ha stuì vegnir transportada davent.
- Pernottaziuns: Ils organisaturs han fatg quint cun 800 atlets ed atletas – la fin sajan quai stadas 1’800 persunas. Pia bleras pernottaziuns supplementaras.
Tgi che surpiglia la finala il deficit n'è anc betg cler. Era quant aut che quel è definitivamain n'è anc betg enconuschent.