Siglir tar il cuntegn
Inhalt

Engiadina Cardiff-Zuoz: «Back to the roots» per emprender rumantsch

Hannah Felce ha passentà sia uffanza fin la vegliadetgna da 13 onns en Engiadina, a Zuoz. Là aveva ella er frequentà la scola primara. Entant n'ha la dunna dentant betg pli duvrà la lingua durant passa 10 onns. Uss vul Hannah puspè emprender puter.

dunna cuntenta
Legenda: Hannah Felce da Cardiff è cuntenta dad esser puspè en sia segunda patria. RTR, Anna Caprez

La giuvna da 26 onns è s'annunziada per la 45avla ediziun dals curs da rumantsch da la Fundaziun de Planta per duas raschuns: Per l'ina vul ella reactivar sia savida da la lingua rumantscha per pudair duvrar quella activamain e per l'autra dovra Hannah Felce il rumantsch er per sia dissertaziun.

Ina chaussa dal cor

Per Hannah Felce che studegia linguas a l’universitad da Cardiff, la chapitala da Wales, è il rumantsch la pli bella. Cun quai ch’il puter saja er sia lingua d’uffanza è il return en Engiadina suenter plirs onns stà fitg emoziunal e collià cun bleras regurdientschas.

dunna serra la porta
Legenda: Per Ursina Dietrich-Planta èn ils 45avels Curs da rumantsch ils davos ch'ella organisescha. RTR, Anna Caprez

Midament al timun dals curs

Suenter dus onns surdat Ursina Dietrich-Planta da Segl en october l’organisaziun dals curs da rumantsch a Martina Shuler-Fluor da Zuoz. Cuntenta è la Segliotta surtut cun il numer da participants quest onn: Cun 80 persunas s'interessan quest onn 17 persunas dapli per ils curs da la Fundaziun de Planta che anc l’onn passà.

RR actualitad 07:00