Il president da la dretgira regiunala da l'Engiadina Bassa/Val Müstair è vegnì accusà, pervia d'abus d'uffizi. Quai rapporta la «NZZ am Sonntag.»
L'abus d'uffizi stettia en connex cun il cartel da construcziun ed il whistleblower Adam Quadroni. I va per in'acziun da las autoritads dal november 2017 encunter Quadroni cura ch'il derschader accusà veva relaschà ina ordinaziun superprovisorica e mobilisà la polizia.
Il procuratur public ch'era vegnì incumbensà da la regenza grischuna d'intercurir il cas ha inoltrà l'accusaziun tar la dretgira regiunala dal Partenz/Tavau. Quella tracta il cas ils 16 da settember. Per l'accusà vala la presumziun d'innocenza.
