Duas grondas foras en il massiv da l'Alvra
Igl è stà ina lavur da pionier: L’onn 1903 èn l’Engiadin’Ota e la Val d’Alvra e Spinas (vischnanca Bever) e Preda, vegnidas colliadas cun in tunnel da 5'864.5 meters lunghezza. Cun zappun e palas è vegnì chavà, la Viafier Retica discurra d’ina «capodovra da la tecnica d’inschigneria» per quel temp. Varga 1'000 persunas èn stadas involvidas en las lavurs da construcziun. Tar ils blers accidents ch’igl ha dà, han 16 persunas pers la vita.
Anc oz passan ils trens tras il tunnel ch'exista uss gia dapi 115 onns. El è però vegnì in pau en ils onns. Examinaziuns han demussà che bleras parts sajan en nauscha cundiziun. Uschia è la Retica stada avant la decisiun d’ina gronda sanaziun u, quai ch’è vegnì preferì, ina construcziun d’in nov tunnel tras il massiv da l’Alvra.
La emprima badigliada per il nov tunnel en il massiv è stada l’onn 2015. Dapli che trais onns èn ils miniers stads vid la lavur. Ils 2 d’october 2018 è la perfuraziun vegnida festivada.
Quella lingia vegn ad avair ina gronda impurtanza per la Viafier Retica en l'avegnir, uschia era per la coesiun tranter Grischunas e Grischuns da l'Engiadina e da la Val Alvra.
Il nov tunnel giascha exact parallel tar il vegl, che vegn tar l’avertura dal nov a servir sco tunnel da segirtad. 12 colliaziuns èn vegnidas construidas uschia tranter las duas foras en il massiv da l’Alvra. Ils emprims trens duajan passar l’onn 2021/2022 tras il nov tunnel.
Emprima lingia electrifitgada da la Retica
Bever gioga dentant betg mo en connex cun il tunnel da l’Alvra ina impurtanta rolla per il traffic public en il Grischun. Bever è numnadamain era stà punct da partenza/punct final da l’emprima lingia electrifitgada da la Retica. Quella è vegnida inaugurada l’onn 1913 tranter Bever e Scuol.
Quella construcziun è stada in pass enorm. Ins na stueva betg pli ir 7 uras da Bever a Scuol cun la charrotscha da chavals. Ins pudeva uss prender il tren sin lingia electrificada ed il tschancun cuzzava sulet pli 2 uras.
Suenter quatter onns da construcziun vid il tschancun han ins fatg gronda festa sur dus dis fin zercladur da quest onn. Varga 300 giasts èn vegnì envidads tar las festivitads a Scuol, tranter quels: trais cussegliers federals ed giasts internaziunals da l’economia e turissem, dunnas dentant naginas.
