Siglir tar il cuntegn

Header

cuntegn

Chalandamarz il matg Scolars da la Val Müstair fan canera a Berna

Cun zampugns talacs e stgellas èn scolaras e scolars da la Val Müstair ids a Berna per far Chalandamarz. Tradiziuns vivas ha vulì mussar il martgà dals parcs svizzers e da l'UNESCO Svizra. Uschia ha il parc da la Biosfera Val Müstair preschentà dasper ils products regiunals era il Chalandamarz.

I saja schon in zic curius da trair en la chamischa da Chalandamarz il matg, ha ditg ina scolara da la Val Müstair. Dentant saja quai era ina «coola» excursiun da pudair ir a Berna. Oravant tut n'haja ella oz perquai nagina matematica, di ella cun in rir. Era sias collegas conferman: bel ma curius. La chamischa saja in zic chauda per la bell’aura e las temperaturas enturn 20 grads sin la plazza federala, ma quai na fetschia nagut. Uss speran era ellas ch'i daventia finalmain pli chaud suenter avair fatg era il matg Chalandamarz.

RR actualitad 07:00