Radund 40 persunas èn sa participadas al lavuratori a Tschlin cun la dumonda centrala co che l’areal da la chasa da scola a Tschlin duai vegnir duvrà en l'avegnir. La discussiun n’è betg nova, ideas datti adina puspè. A maun da chavazzins è vegnì evaluà en gruppas da lavur nua ch’ins vuless metter pais.
La sala polivalenta a Tschlin duai restar in lieu impurtant per la populaziun e las societads
La selecziun or da quatter chavazzins preschentads è stada clera en il lavuratori: la musica populara duai esser il fil cotschen, uschia Fadri Riatsch, il president da la cumissiun «Chasa da scola Tschlin». La suprastanza da la vischnanca da Valsot ha entant deliberà in credit da 100'000 francs per il project.
En in proxim pass vul la cumissiun evaluar e preschentar l’idea centrala a la suprastanza communala da Valsot. Il punct il pli impurtant saja da chattar persunas u organisaziuns ch’èn prontas da realisar l’idea, ha suttastritgà Fadri Riatsch.