Siglir tar il cuntegn
Inhalt

Engiadina Chasa da tgira Promulins: realisaziun ils proxims 2-5 onns

Tenor ina communicaziun a las medias ha la gruppa da lavur per il project Promulins preschentà emprims resultats ed ils proxims pass en connex cun la renovaziun e l’engrondiment da la chasa da tgira Promulins a Samedan. Il studi fatg prevesa in program da spazi flexibel.

promulins
Legenda: La chasa da tgira actuala duai vegnir engrondida e renovada mad

Previs saja da remplazzar il tract vegl cun in nov edifizi e sanar la part la pli nova da la chasa da tgira actuala. En tut duai dar 48 letgs da tgira e 12 per persunas cun demenza cun l'opziun d'in eventual engrondiment pli tard, sche quai faschess da basegn. Lura cun ulteriurs 24 letgs.

205'000 francs per lavurs gia fatgas

Las suprastanzas communalas duain uss decider davart il credit da 205'000 francs per cuvrir ils custs da lavurs gia fatgas.

Il proxims pass vegn tenor la communicaziun ad esser ina votaziun en las singulas vischnancas davart in credit da planisaziun da radund 1,1 milliuns francs. Sco terz pass suondan las votaziuns per il credit da construcziun.

2018 fin 2021 sche tut va bain

En quests onns duai la realisaziun dal project esser realistica uschia la gruppa da lavur en sia communicaziun. Anc avert è co proceder cun Puntraschigna, ch'aveva ditg na a la participaziun al project a San Murezzan.

RR actualitad