Siglir tar il cuntegn

Header

cuntegn

Engiadina Chastè da Tarasp mida ses possessur

CCun la surdada da la clav mesemna avant mezdi va il chastè da Tarasp da la famiglia von Hessen tar il artist indigen Not Vital. Suenter ch’ils contracts èn firmads vul il nov possessur er tradir dapli davart ses plans cun l’edifizi istoric.

Gia dal 2004 aveva la possessura dal chastè da Tarasp, la famiglia von Hessen dat enconuschent ch’els veglian vender il chastè. Quella giada discurriv’ins anc d’in pretsch tranter 20 e 30 milliuns francs. La vischnanca da Tarasp e la regiun d’Engiadina Bassa han reagì svelt ed evità ch’il edifizi istoric na vegnia betg en mauns da speculants e na fiss uschia betg pli accessibel al public.

Contracts sut tetg

Oz, 12 onns pli tard è la vendita dal chastè da Tarasp pronta. La famiglia von Hessen venda il chastè fabritgà en il 11avel tschientaner a Not Vital da Sent per 7,9 milliuns francs. Per firmar ils contracts sa scuntran las partidas mesemna in Engiadina Bassa.

Regiun stat davos il chastè da Tarasp

Previs è che l’artist Not Vital cumpra il chastè, la vischnanca da Scuol surpiglia la gestiun e garantescha ensemen cun la Fundaziun Chastè da Tarasp l’access public cun maximalmain 200'000 francs l’onn.

L’atun passà aveva il suveran da Scuol approvà la vendita dal chastè da Tarasp a Not Vital e cun quai er suttastritgà l’impurtanza da l’edifizi per la regiun.

Attracziuns d’art

Sco che Not Vital aveva gia communitgà curt avant la votaziun in settember 2015, prevesa el da realisar en las miraglias dal chastè in lieu d’inscunter public cun attracziuns d’art. Il project sco tal vegn l’artist a preschentar proximamain.

Artitgels legids il pli savens

Scrollar a sanestra Scrollar a dretga