Dapi tschintg onns èn Werner Fischer e Bubo in pèr fitg particular. I na dat numnadamain pratic nagin che tegnia quest animal uschia sco il magister da sport e gimnastica da Ftan.
Per insumma pudair tegnair questa bestga en furma uschè chasana, ha Werner Fischer betg mo stuì absolver ina scolaziun speziala per tegnair utschels da rapina, mabain er far la patenta da chatscha.
Quai ch’era al cumenzament plitost in stuair malcumadaivel è sa sviluppà en il fratemp ad ina gronda passiun. Ma er a chatscha è Werner Fischer in agen: El va numnadamain mo a chatscha da muntanellas.
Il motiv: Per l'ina vul el reducir il dumber da muntanellas en quellas pastgiras nua ch’ellas chaschunan donns per l’agricultura. Per l’autra gioga la tematica da viver ina vita persistenta ina rolla fitg gronda en sia vita. Las muntanellas da Werner Fischer vegnan numnadamain elavuradas e consumadas cumplettamain dal chau enfin a la cua e quai da ses piv «Bubo» e dad el sez.