Billy è ina bracca austriaca da dus onns e mez. Durant il temp da la chatscha auta fa Billy ensemen cun ses patrun e guardiaselvaschina Gian Fadri Largiadèr regularmain retschertgas da selvaschina in Engiadina.
Retschertgas vegnan duvradas, sch’ina bestga scappa suenter in tun anc uschè, ch’il chatschader u la chatschadra na la chatta betg pli.
Sche quai capita, sto il chatschader u la chatschadra telefonar a la centrala dal BSC, il club da chauns da sang grischun. Là vegn organisà in team da retschertga – dimena in chaun da sang cun ses patrun. In Engiadin’Ota existan circa 15 da quests teams da retschertga.
Sch’in chatschader dumonda ina retschertga è il pli impurtant, da sa prender temp e da sa far il emprim in purtret precis sin il lieu, co che tut è capità.
Per il pli spetga il team da dus in pèr uras enfin che la retschertga cumenza, quai per laschar temp e paus a la bestga ferida per murir ed era ch’el chaun po far sia lavur sin il fastiz fraid, senza ch’el è memia gnervus.
Gian Fadri Largiadèr fa dapi 23 onns retschertgas cul chaun e tuttina è ina retschertga mintga giada insatge spezial ed era emoziunal, causa ch’el na sa mai, tge che spetga el. Suenter ch'il chaun ha fatg sia lavur e la bestga è vegnida chattada ins senta, che il mainachaun, ma era il chatschader u la chatschadra èn fitg grats e cuntents.
