Co reagir sch’in chaval sa chatta en ina situaziun d’urgenza e co bada ins insumma ch’in chaval na stà betg bain? Da quellas dumondas sa han occupads ils participants e las participantas d’in curs d’agid d’urgenza per chavals sin il bain da chavals San Jon sur Scuol.
Enconuscher anatomia dal chaval
Tenor la veterinaria e manadra dal curs, Sibylle Lüthi, èsi impurtant ch’ils possessurs da chavals enconuschan l’anatomia. Uschia enclegian els meglier ils differents sintoms da malsognas u feridas. Dar emprim agid – vul dir savair mesirar fevra u il puls. Cun quellas infurmaziuns sa possian ins sustegnair al veterinari via telefon – enfin ch’el saja in il lieu.
Tractar feridas pitschnas
Er feridas pitschnas stuessan chavaltgaders pudair tractar sasez. Liar ina fascha – quai n’è però betg uschè simpel. Numnadamain ston ins savair quant ferm ch’ins po trair, per ch’igl n’è betg memia ferm e betg memia luc. Savair gidar ad in chaval sch’el è en ina situaziun d’urgenza, quai vul pia esser exercità – sa però salvar vita!
