Radund 90 dunnas da la regiun Engiadina Bassa èn dapi il schaner 2025 mintga mardi saira vegnidas ensemen a chantar en in chor da project dunnas, manà da la chantadura e dirigenta Nina Mayer.
Naschida era l’idea suenter ina festa dad anniversari nua che pliras dunnas han chantà tut spontan en pliras vuschs ina chanzun. Che gist tantas chantaduras vegnian, cun quai n’haja ella betg fatg quint, ha ditg la dirigenta da Ramosch.
Jau aveva ditg che nus emprovan sche almain 15 dunnas s’annunzian. Finalmain èn vegnidas passa 90, quai n’avess jau mai cret.
Il repertori per ils dus concerts sa cumpona da chanzuns da tut gener ed er en differentas linguas, tuttas cun il focus da la «glisch».
Exercità las chanzuns han las Engiadinaisas ch’abiteschan tranter Lavin e Martina, er sco pensum da chasa. Quai è stà pussibel grazia a registraziuns da las differentas vuschs.
Da 15 fin 80
Sa participadas al project da Nina Mayer èn las dunnas da la vegliadetgna tranter 15 e 80 onns ord differents motivs. Saja quai per ristgar da chantar l’emprima giada insumma en in chor ubain er pervi da la cumpagnia e surtut pervi da la dirigenta dal chor sez.
Jau sun vegnida en il chor da dunnas be pervi da Nina. Ella è buna da manar e fascinar uschè bain nus tuttas.
Sch’il project da chor va a terminar suenter ils dus concerts saja da dubitar, ha ditg l’inizianta Nina Mayer.
Er il giavisch da numerusas chantaduras dal chor da cuntinuar cun il chant saja grond – en tge furma adina, uschia il tenor.
L’emprim concert dal chor da dunnas Engiadina Bassa ha procurà per ina baselgia stetgiras plaina. Il segund concert ha lieu dumengia, 15 da zercladur 2025 a las 17:00 en la baselgia evangelica da Scuol.