Dapi Pasca è il kino en la staziun da Lavin en funcziun. Dapi lura vegn mussà mintga fin d'emna in film, adina venderdi e sonda il medem. Durant la stad ha il kino fatg pausa, persuenter hai dà il kino openair a Lavin. Mussads vegnan films actuals da pitschens distributurs da film. Blockbusters n'èn damai betg da chattar sin il program da kino.
Tenor Jürg Wirth, che ha fatg part da la gruppa da project ed è commember da la societad che maina il kino, è la bilantscha suenter ils emprims sis mais positiva.
Jau hai fatg ora il quint. Nus avain mussà 18 films, quai èn 36 represchentaziuns. Tar quellas avain gì radund 500 giasts, quai è in'occupaziun da var 60%. Per in kino è quai ina fitg buna quota.
Finanzià tras donaziuns
Da metter ad ir il kino en l'anteriura remisa da la staziun da Lavin ha custà radund 190'000 francs. Finanzià è quest import vegnì tras donaziuns, sponsurs ed in crowdfunding. Il kino è en emprima lingia in kino. La sala po dentant era vegnir nizzegiada per autras occurrenzas.
Premiera da film
La sonda, ils 15 d'october, ha gì lieu ina premiera da film en il kino a Lavin. Per l'emprima giada han Flurina Badel e Jürg Gautschi mussà lur film «Sindy». Igl è in roadmovie ch'els dus avevan filmà già l'onn 2009, dentant pir uss finì e preschentà. Il film è ina producziun low-low-budget, sco els dus han ditg avant che mussar il film. Els han filmà sez, fatg sez il tun ed era ils acturs eran els sez.
Nus n'avain betg gì in script, quai era tut improvisaziun. Nus avevan creà las figuras e ponderà per mintga szena tge che lur motivaziun è e lura giugà quai.
Ch'els han finì il film pir uss, cun 13 onns retard, saja special, di Jürg Gautschi. Pertge vairamain hajan mancà mo pli ils suttitels. La premiera era per els dentant in success. Tar tuttas trais represchentaziuns era il kino en la staziun da Lavin plain.
