Siglir tar il cuntegn
Inhalt

Engiadina Citad d'energia: Nagin premi – ma in’incumbensa per Scuol

A Scuol vegn surdà il label «citad d’energia». Cun quest label empermettia il vitg da proseguir ina politica d’energia pli effizienta.

Scuol Sot cun il clutger.
Legenda: Scuol Sot cun il clutger. RTR, Georg Luzzi

San Murezzan e La Punt possedan gia il label «citad d’energia». Ussa tutga era Scuol tar ils vitgs cun quest label. Quest label è betg in premi che undrescha in vitg per las prestaziuns fatgas per daventar pli effizient e pli ecologic en il sectur d’energia. Quest premi survegn in vitg sch'el sa declera pront da proseguir ina politica che vul utilisar pli effizient e cuntinuadamain l’energia.

Exempel: nizzegiar sinergias

Diversas chasas sa chattian en vischinanza dal Bogn Engiadina Scuol, cun in concept energetic vul ins trair a niz las sinergias e realisar cuminaivlamain in stgaudament en furma dad ina pumpa da chalur.

In project era per privats

Il vitg duess esser propugnatur sin quest sectur ed animar era possessurs da chasas privatas da fabritgar en moda e maniera optimala per spargnar current electric.

Il vitg ha quatter onns temp per realisar ils emprims projects. Suenter quels onns vegn alura l’instituziun purtadra «EnergieSchweiz» ad evaluar il progress per decider sch'il vitg dastga restar enavant ina «citad d’energia».

L'instituziun purtadra «EnergieSchweiz»

«EnergieSchweiz» è in program dal Cussegl federal per promover l’effizienza d’energia ed era quella regenerabla. Ils vitgs en Svizra duessan voluntarmain proseguir ina politica che sustegna mesiras per spargnar anc dapli current electric. «EnergieSchweiz» sustegna quels vitgs cun projects ed era finanzialmain.

RR actualitad 07:00