Siglir tar il cuntegn

Header

Navigaziun

Legenda: Guardar il video Regiun Malögia survegn halla da glatsch. Durada 02:44 minutas.
Or da Telesguard dals 10.02.2019.
cuntegn

Engiadina Cler GEA a halla da glatsch en Engiadin’Ota

Il suveran da la Regiun Malögia ha approvà cun 77.5% l’iniziativa davart la construcziun e gestiun d’in center da sport sin glatsch cun halla da sport e d’eveniments. Uss è la halla in’incumbensa regiunala.

Il cler resultat a l’urna demussa ch’il giavisch e basegn d’ina halla da glatsch è fitg grond en la Regiun Malögia. Cun approvar la missiva datti uss er ina cumplettaziun d’in artitgel en ils statuts.

Be Bregaglia encunter

Da en tut 12 vischnancas han 11 acceptà la halla da glatsch. Igl èn las vischnancas da l'Engiadon'Ota ch'han votà GEA. Sulettamain la Bregaglia era encunter in center da sport, quai cun otg vuschs differenza

Resultat da la votaziun

VischnancaVuschs GEA
Bever
83.54
Bregaglia48.82
La Punt Chamues-ch
79.07
Madulain73.13
Puntraschigna84.32
Samedan73.38
San Murezzan
81.08
S-chanf74.48
Schlarigna88.71
Segl84.21
Silvaplauna83.68
Zuoz74.74

Almain regna transparenza

Da la realisaziun d’ina halla da sport en la regiun èn ils iniziants dentant anc lunsch davent. Grazia al resultat da dumengia è almain cler co ch’ins vul cuntinuar en chaussa. En ina proxima votaziun duai vegnir vuschà davart ina cunvegna da prestaziun tranter la Regiun Malögia e las singulas vischnancas per evaluar il lieu ideal per ina halla da glatsch e sclerir er adattaziuns necessarias da la planisaziun locala.

1 pass d’almain 4

Suenter duai il suveran d’Engiadin’Ota e Bregaglia er incumbensar la Regiun Malögia da sclerir e fixar purtaders da fabrica, sco er deliberar in credit da planisaziun per elavurar in project preliminar. Ed en ina terza votaziun vai per la fundaziun d’ina societad da gestiun.

Resalvas

Mintgina da questas cunvegnas da prestaziun po mintga singula da las 12 vischnancas acceptar ubain refusar. En cas ch’ina u pliras schessan da na, avess ins dad elavurar ina nova cunvegnan da prestaziun cun ina nova clav da repartiziun.

RR novitads 14:00