Siglir tar il cuntegn

Engiadina Clinica Curativa - in ulteriur anè en la chadaina da sanadad

Il Center da sandà Engiadina Bassa porscha a partir dal 2016 in nov cumpartiment. La Clinica Curativa è spezialisada per pazients che lessan sa remetter d’ina greva malsogna.

Dr. Richard Ploner il directur da la nova Clinica Curativa avant la tavla da recloma
Legenda: Dr. Richard Ploner il directur da la nova Clinica Curativa a Scuol RTR, G. Luzzi

Dapi bainbaud 10 onns exista en l'Engiadina Bassa la collavuraziun en chaussa sanadad. L'ospital regiunal, ils servetschs da spitex, la chasa da tgira Chüra Lischana, la gruppa da tgira da Zernez sco era il Bogn Engiadina Scuol èn sa mess ensemen al Center da sandà Engiadina Bassa (CSEB). A partir dal 2016 ha il CSEB engrondì la purschida. Quai è vegni communitgà a chaschun da la conferenza da pressa dal quint annual 2015.

Clinica Curativa – il pli nov uffant

Ina greva malsogna restrenscha la qualitad da viver. En il cumpartiment da reabilitaziun vuless ins dar als pazients puspè nova vitalitad, curaschi e fidanza.

Directur da la nova purschida è Richard Ploner. Il cumpartiment vegn ad esser per part en il ospital e per part era en il hotel Belvair en vischinanza dal Bogn Engiadina Scuol.

Onn da gestiun equilibrà

Il CSEB po guardar enavos sin in bun onn da gestiun 2015. L'interpresa ha serrà il quint annual cun in resultat equilibrà. Allegraivel, tenor il directur Philipp Gunzinger, è oravant tut l’augment da pazients staziunars. Quel sa ha augmentà per bunamain 10% cumpareglià cun l’onn 2014.

RR novitads 15:00