Siglir tar il cuntegn
Inhalt

Engiadina Club da skiunzs Zuoz maina restaurant Pizzet

La radunanza extraordinaria ha decis unanim da fundar per quai ina societad cun responsabladad limitada. Il Club da skiunzs Zuoz ha deliberà per fundar la nova organisaziun cun ina giunta, in emprest da 20’000 francs.

Pizzet cun terrassa
Legenda: Il restaurant Pizzet porscha er ina gronda terrassa per giudair il sulagl en la regiun da skis. mad

Avant ch'inoltrar in’annunzia per gestiunar il restaurant che sa chatta entamez la regiun da skis da Zuoz, ha la suprastanza dal club da skiunzs Zuoz evaluà tut ils ristgs e custs. Cun ina svieuta da 250’000 francs vess il quint dad ir si, ha declerà il president dal club, Claudio Duschletta.

Emploiads e voluntaris

Calculà han ils responsabels dal club da skis in numer da persunal da totalmain 6 persunas durant tut la stagiun. Il cuschinunz, Rageth Luzi è il medem mument er manader da fatschenta.

Sche nus vulain ch’i gira puspè sin la muntogna, vain da pigliar en maun sez ils frandaivels e far sez insatge.
Autur: Claudio DuschlettaPresident Club da skiunzs Zuoz
Restaurant Pizzet
Legenda: Il restaurant Pizzet è ina da duos ustarias en la regiunda skis sur Zuoz. mad

Ina giunta da trais commembers vegn a tegnair en maun ils mastrins dal restaurant che è en possess da la societad Runals e sutgeras Zuoz (SSZ). Durant la stagiun d’enviern e surtut durant dis da stagiun auta u tar eveniments spezials, vul ins chattar persunas or dal ravugl dal Club da skiunzs Zuoz ch’èn prontas da lavurar ad uras en il restaurant che porscha plaz per bun 100 persunas. Ils voluntaris vegnian remunerads cun 20 francs l’ura. Lur salari possian els laschar pajar or ubain dar ils raps en la cassa dal club.

Puspè lieu d'inscunter

Impurtant è tenor il president dal club, ch'ins realisescha grazia al project in lieu nua che indigens e giasts van puspè gugent e ch'il sentiment d'identificaziun cun la regiun da skis Zuoz creschia en la populaziun. En tut quinta il Club da skiunzs Zuoz bun 200 commembers.

RR actualitad 17:00