Siglir tar il cuntegn
Inhalt

Engiadina Co ch'il «Terror en Engiadina» ha unì ina classa...

Ils scolars da l’emprima classa reala da Samedan han realisà ensemen cun l’autura e magistra Romana Ganzoni in roman. Quel preschentan ils scolars ensemen cun ina classa dal Misox al public.

Il project naziunal «Schulhausroman.ch» datti dapi quest onn en tut las quatter regiuns linguisticas. Uss han realisà ils scolars da Samedan l’emprima istorgia en rumantsch. Ils romans èn istorgias che naschan en las chasas da scola durant l’instrucziun normala. Ellas vegnan creadas ensemen cun in scriptur durant plirs mais da classas dal stgalim aut.

Emprim project grischun

L’autur svizzer Richard Reich aveva inizià il project «Schulhausroman» dal 2005. Entant è il project enconuschent en tut las parts da la Svizra. L'idea è, ch'auturas u auturs èn buns da scriver en collavuraziun cun scolars in text ficziunal entaifer in temp limità – e quai dal sboz fin tar il manuscrit pront per stampar.

En il cas da Samedan ha la scriptura da Schlarigna, Romana Ganzoni, gidà a realisar il roman da scola cun il titel «Terror in Engiadina»

Jau sun stada stutta quant ferm ch’ils scolars èn s'engaschads d’emprim ennà e quai cun fieu e flomma.
Autur: Romana Ganzoniautura Schlarigna

Lavur intensiva, ma bella....

Ils inscunters durant ils davos trais mais, adina ina giada l’emna duas lecziuns, sajan stads d’emprim ennà fitg agreabels ed ils scolars da l’emprima reala da Samedan hajan proponì numerusas istorgias ed ideas fitg creativas, sa regorda l'autura da Schlarigna. Perfin cur ch’els han gì da glimar vi dal text, haja ella survegnì sustegn ed inputs dals scolars.

Preschentaziun individuala

Il product final dal projet, il roman da scola che la classa Samedrina ha realisà ensemen cun Romana Ganzoni, preschentan ils scolars durant ina sairada al public. Quai vegnia fatg en differentas manieras, dal recitar parts dal roman en furma da chor, sur il preleger passaschas, fin tar il sustegn da chant durant la represchentaziun.

Ils scolars han emprendì a star davant glieud e preleger in text senza cumenzar a tremblar gista l’emprim mument.
Autur: Gilbert Rebermagister Samedan

Promover er ils pli debels

Spezial vi dal project saja, uschè Romana Ganzoni che ha en quest cas gì la rolla da coach da scriver, che tut ils scolars vegnian resguardads. Er quels che han difficultads en in u l’auter rom. Cun la realisaziun d’in roman ch’ina classa ha scrit cuminaivel datti als scolars er in sentiment da success en ina sparta che saja normalmain colliada cun nauschas experientschas.

Engiadina e Misox

Parallel cun il project en Engiadina han er ils scolars da la terza secundara da Roveredo sviluppà ensemen cun agid dal scriptur Vincenzo Todisco in «romanzo a scuola» – numnadamain in'istorgia misteriusa cun il titel «il segreto del palazzo». Entant datti tuttas duas istorgias en tuttas duas linguas en furma d’in cudeschet talian-rumantsch.

La preschentaziun dals scolars da Samedan e da quels da la 3. classa reala da Roveredo (talian) ha gì lieu venderdi saira, 13 d’avrigl 2018 a las 20:30 en l’Hotel Reine Victoria a San Murezzan.

RR actualitad 17:05