Siglir tar il cuntegn
Inhalt

Engiadina Co finanziar eveniments en Engiadin'Ota en futur?

Cun la nova furma d'organisaziun da la destinaziun da turissem Engiadina San Murezzan davent dal 2018 sa mida era sia finanziaziun. Tranter auter è vegnì stritgà bundant in milliun or dal preventiv che la destinaziun ha gì a disposiziun per sustegnair occurrenzas en la regiun.

Legenda:
La repartiziun dal milliun per il sustegn d'arranschaments en l'Engiadin'Ota fin il 2017 Regiun Malögia

Davent da l'onn proxim surprendan las vischnancas la decisiun, tge occurrenzas ch'ellas vulan sustegnair cun quants raps. Per ils organisaturs vul quai dir, ch'els ston dumandar mintga vischnanca singula e betg mo ir tar la destinaziun da turissem.

La conferenza dals presidents communals ha discutà pliras giadas il tema e decidì mez settember da stabilir ina gruppa da lavur. Quella duai sclerir, co che la finanziaziun po vegnir segirada era en l'avegnir e tenor tge criteris che las occurrenzas duain survegnir sustegn finanzial.

Strategia communabla

Ils presidents communals han decis da princip da vulair integrar en ils preventivs da lur vischnancas per l'onn 2018 il medem import sco paja da lur vischnanca fin qua a la destinaziun da turissem per il sustegn dad eveniments. Actualmain vegnan ils preventivs elavurads. L'ultim pled en chapitel ha lura il suveran quest atun.

Malsegirezza per organisaturs

Per ils organisaturs da las occurrenzas en Engiadin'Ota è la situaziun actuala ina situaziun da malsegirezza. Quai han confermà tranter auter Menduri Kasper dal Maraton da skis engiadinais e Pascal Benesch da l'Openair Chapella. I saja simplamain pli difficil da planisar senza la segirezza finanziala, cunquai ch'ils preventivs vegnan deliberads pir il november/december.

RR actualitad 12:00