Co vinavant cun stgalim aut da Zernez ?

Il suveran da la vischnanca fusiunada Zernez duai decider sch’il cussegl communal po instradar emprimas tractativas per eventualmain dischlocar il stgalim aut da la scola vers l’Engiadin’Ota a Zuoz.

chasa da scola da Zernez Bild in Lightbox öffnen.

Legenda da maletgs: La chasa da scola da Zernez M. Fontana

Fin l’onn passà faschevan part al consorzi da scola A fin Z las vischnancas dad Ardez fin Zernez. Nov van il scolars da Guarda ed Ardez in avegnir a Scuol a scola ed il consorzi n’exista pli.

Da mantegnair la medema purschida cun 6 classas er per ils radund 40 scolars da Lavin, Susch e Zernez che restan a Zernez na rendia dentant betg. Er la qualitad da l’instrucziun cun pliras uras d’instrucziun spezialas patiss sut quel fatg.

Scolars da 5 lieus sut 1 tetg?

Perquai han il cussegl communal da Zernez e las quatter suprastanzas communalas da La Punt, Madulain, Zuoz e S-chanf discutà davart soluziuns pussaivlas. L’idea fiss da realisar in nov campus da scola per ils dus consorzis da scola Zernez e Plaiv a Zuoz e da surdar la gestiun da las duas scolas al Lyceum Alpinum a Zuoz.

Convict cun nova funcziun?

Il lieu potenzial per realisar il tal project pudess esser il Convict a Zuoz. Per instradar ils proxims pass datti dentant anc plirs puncts ch’èn da sclerir. Dad ina vart in clar consentiment da la populaziun da Zernez, da l’autra vuli la lubientscha dal chantun ch’ina scola privata sco il Lyceum Alpinum pudess manar las duas scolas publicas. Pir cura che la regenza dess glisch verda, vul il Lyceum Alpinum s’exprimer concretamain davart ils plans d’investiziun.

La radunanza communala da Zernez ha da decider ils 31 d’avust 2015 in chaussa.

La populaziun da las vischnancas da la Plaiv (La Punt, Madulain, Zuoz e S-chanf) infurmeschan ils cussegls communals ils 25 d’avust 2015 a Zuoz.