Las vischnancas da La Punt Chamues-ch e da Bever èn sa decididas da metter ensemen las scolinas. Uschia van dapi il cumenzament da scola 2020/2021 trais scolarets da Bever a scolina a La Punt Chamues-ch. Tenor Urs Niederegger, il chanzlist da La Punt Chamues-ch, saja quai ina situaziun da win-win. La Punt Chamues-ch ha in pli grond dumber da scolarets e Bever na sto betg sa participar finanzialmain vid la scolaziun sco tala.
Per la vischnanca da La Punt Chamues-ch na chaschuna questa situaziun betg per dapli custs. La vischnanca da Bever sa participescha però vid ils custs da material e surprenda il transport per ils uffants.
Fusiun da scola primara
Il project da metter ensemen las duas scolinas vulan ins testar tenor Urs Niederegger in onn. Suenter duai vegnir decidì sch’il project cuntinuescha. La Punt Chamues-ch saja però er interessà vid ina fusiun da tut la scola primara cun Bever. Er per quella decisiun hajan ins però vulì spetgar giu quest onn da test da las scolinas.