Siglir tar il cuntegn

Engiadina Collisiun d'in auto cun in'ambulanza

Tranter Ramosch e Strada en l'Engiadina Bassa hai dà gievgia saira in accident tranter in auto privat ed ina ambulanza.

helicopter sin via
Legenda: L'accident è capità tranter Ramosch e Strada. RTR, Georg Luzzi

Tenor emprimas scuvertas da la polizia chantunala saja in tudestg da 46 onns ì cun ses auto da Scuol direcziun Martina sin la via principala H27. Il medem mument è in'ambulanza dal salvament Samnaun ida encunter. En la storta a dretg èsi lura vegnì tar la collisiun frontala.

Sco la polizia ha ditg sin dumonda, sajan la Rega ed ils pumpiers stads al lieu. Quatter persunas sajan vegnidas blessadas per part grevamain. Il manischunz da l'ambulanza è stà serrà en. El ha stuì vegnir salvà dals pumpiers. El è vegnì transportà cun l'ambulanza en il Center da Sandà Engiadina Bassa a Scuol.

Il manischunz tudestg ed ils ulteriurs sanitaris sco era la persuna ch'era en l'ambulanza per vegnir transportada èn vegnids sgulads cun agid da la Rega e da la Heli Bernina en l'ospital chantunal a Cuira.

La via è stada serrada per in'ura e mesa en domaduas direcziuns.

RR novitads 18.00++