Dapi passa 10 onns vegn discutà en Engiadin'Ota, tgi ch'è responsabel per il salvament ord las auas en la regiun. Nov schlantsch aveva questa tematica survegnì l'atun 2017, cur ch'il chantun ha decis da schliar la gruppa da sfunsaders da la polizia.
Il schaner da quest onn era vegnì publitgà in concept en chaussas salvament ord las auas per l'Engiadin'Ota. Quel vegn a la conclusiun: Sch'intgin ha da vegnir salvà or da la aua, saja quai ord ils lais u or da flums, lura saja quai chaussa da las vischnancas – e perquai duessan quellas s'organisar. Elavurà il concept aveva ina gruppa da lavur incumbensada dal chantun.
Uss piglia la regiun Malögia per mauns il tema: La gruppa da lavur duai restar activa – ma sin basa regiunala.L'incumbensa è clera: Ella duai chattar ina soluziun las vischnancas da la regiun, oravant tut per quellas cun lais, che vegnan duvrads turisticamain.
A sia proxima sesida duai la conferenza da presidents da la regiun Malögia lura decider dal concept e da las finanzas per reglar finalmain la segirezza sin lais, en vals e chavorgias.
RR actualitad 12:10