Radund 1'000 partenzas èn annunziadas al Concours Hippique a Zuoz, ch'ha lieu dals 11 fin 14 d'avust. Radund 600 partenzas ha il concours da stad a San Murezzan nudà la fin d'emna passada. Quai èn cifras sco avant la pandemia. Tuts dus concours èn damai returnads a lur andament normal.
Nus essan vegnids puspè ad ina grondezza pli famigliara e quieta. Per nus è quai bun ed era pli facil d'organisar.
La stad 2020 è il Concours Hippique a San Murezzan stà pli u main l'unic turnier da siglir per chavals ch'ha gì lieu. Perquai avevan ils organisturs nudà radund 1'200 partenzas. A Zuoz percunter aveva il comité d'organisaziun decidì da desister. Gia l'onn passà era il pli vegl concours da stad en Engiadin'Ota puspè vegnì a radund 1'000 partenzas. Ina cifra che Ladina Tarnuzzer, la presidenta dal comité vul cuntanscher era quest'onn.
Las annunzias per quest'onn èn vegnidas fitg a curta vista. Entant avain nus però ragiunt las 1'000 annunzias, quai ma fa grond plaschair.
A tuts dus concours, ch'han lieu tradiziunalmain las emprimas duas fins d'emna d'avust èsi damai gartegià d'avair lieu era suenter la pandemia sco avant. Era quai che pertutga las finanzas. Tuts dus concours hajan sponsurs fidaivels uschia che la finanziaziun saja stabila, conferman tuttas duas presidentas dals comités d'organisaziun.