Siglir tar il cuntegn
Inhalt

Engiadina Concurrenza da project per nov center regiunal a Samedan

Durant ina saira d’infurmaziun è ina buna 50ina vegnida a savair dapli dals plans dal Chantun Grischun, la Viafier Retica ed er la vischnanca da Samedan areguard l’areal enturn la staziun da Samedan.

Previs è da realisar in ulteriur center regiunal a Samedan, quai per 21 milliuns francs. En quel duain esser 13 differents uffizis chantunals sut in tetg. Tranter auter la Polizia Chantunala, che vul rinforzar sia preschientscha en Engiadin’Ota sin radund 50 persunas, ha ditg il schef da la Polizia Regiunala Ost, Marco Steck a la saira d'infurmaziun.

Viafier ha er plans

La Viafier Retica saja per il mument er en ina fasa da modernisaziun e prevesa er plirs midaments sin l’areal da la staziun da Samedan, ha confermà il directur, Renato Fasciati. Sper localitads per dar a fit sco biro u butias, sajan er previsas radund 15 abitaziuns pli pitschnas en ils novs stabiliments da la Viafier Retica.

Grond buccada ha il Chantun

Il center regiunal d’administraziun dovra radund 4/7 da l’areal. Per che tut ils plans hajan plazza en il perimeter definì, vegn la concurrenza d’architectura er publitgada da quatter partidas: la vischnanca da Samedan, il Chantun Grischun, la Viafier Retica ed involvida è er l’Unesco.

Centralisar è il pled clav

Cun metter ils uffizis en il nov center regiunal, datti 120 plazzas da lavur a Samedan. Cun quel pass possian ins er trair a niz dapli sinergias entaifer ils differents biros, spargnar fits per localitads e finalmain realisar la decisiun da centralisar tut en total 8 centers en il Chantun Grischun.

Samedan Nr. 2

La strategia d’immobiglias era vegnida lantschada il 2016. Otg centers sajan entant gia realisads, uschia il maister constructur dal Chantun Grischun, Markus Dünner. Quel a Cuira è curt avant l’avertura, Samedan fiss il segund grond ed il pli pitschen center regiunal duai vegnir realisà a Poschiavo.

Gronda schanza per Samedan

Sco il president communal da Samedan Jon Fadri Huder ha ditg suenter la sairada d’infurmaziun, saja il project dal Chantun e la Viafier Retica in impuls optimal per la vischnanca. Ils plans enturn la staziun signifitgian dentant er ina tscherta sfida. Il privel ch’il center da Samedan vegnia visità anc pli pauc, saja dà, uschia Huder.

Colliaziun center cun periferia

Uss saja dentant da chattar soluziuns e trair a niz il fatg che gist trais projects gronds vegnan realisads ils proxims onns a Samedan. Sper ils plans per ina nova plazza aviatica ed il nov center regiunal d’administraziun è enconuschent dapi duas emnas er il project da l’emprima Migros en Engiadina a Cho d’Punt. Per colliar meglier il center, la staziun cun il quartier enturn la plazza aviatica, saja la vischnanca vid il planisar ina nova punt, ha infurmà il president communal.

Sche tut va tenor plan vuless ins cumenzar cun il project Sinergia che cumpiglia ina surfabricaziun da l’areal sper la staziun da Samedan la primavaira dal 2022.

RR novitads 12:00