La concurrenza internaziunala ha la finamira da sustegnair l’instrucziun da matematica en scola, da mussar als uffants da la 3. primara enfin las scolas da gimnasi quant fascinanta che la matematica po esser. Tenor la presidenta da la societad «Kenguru» en Svizra, ma era internaziunal Meike Akveld, matematicra a la Scola politecnica federala, na sa tracti qua betg d'ina concurrenza tranter scolas u pajais.
Ils uffants han da schliar 24 dumondas entaifer 60 minutas. Mintga singula scolara e scolar survegn lura persunalmain il resultat. La finamira saja alura ch'ina u l’auter s’interessescha en l'avegnir per roms sco matematica, informatica, scienzas da la natira u tecnica.
Testai Vossa savida matematica
Concurrenza era per vallader
Dapi in onn pon ins er absolver questa concurrenza per rumantsch vallader. Ina magistra engiadinaisa ha inizià quell’idea ensemen cun la Lia Rumantscha.
Questa concurrenza internaziunala ha lieu en 90 pajais dal mund. Bun sis milliuns uffants sa participeschan, da quels var 58’000 en Svizra. La concurrenza ha lieu mintg’onn a la fin da mars.