Siglir tar il cuntegn
Inhalt

Engiadina Construcziun da serenera regiunala ARO tenor plan

Il project d’in nov implant regiunal per 9 vischnancas da l’Engiadin’Ota duai esser pront sco previs per il 2020/2021. Actualmain è la serenera dador S-chanf il pli grond plazzal da fabrica dal maun public en Engiadina.

La nova serenera ARO a S-chanf è in project che remplazza las trais sereneras a Schlarigna (Staz), Bever (Sax) e S-chanf (Furnatsch). Il project custa 76,5 milliuns francs e correspunda a las prescripziuns actualas davart tecnologia ed effizienza ed è er persistent.

Pli economic

La soluziun regiunala d’ina unica serenera per ils abitants tranter San Murezzan e S-chanf, è dad ina vart pli ecologica, ma il project è er cun ils custs da gestiun da 6,13 milliuns francs pli economic che sanar e cuntinuar cun las trais sereneras existentas.

Modular e flexibel

Il concept da la nova serenera ARO prevesa parts flexiblas, nua ch’ins pudess engrondir l’implant cun singuls moduls. Concepida è la serenera regiunala per 75’000 abitants. Per elavurar pli svelt ed effizient durant il temp d’auta stagiun l’aua malnetta che riva en la nova serenera ARO, vegnia gidà er cun chemia, ha declerà Yves Quirin da l’Uffzi per la natira e l’ambient. Normalmain fan dentant las bacterias la gronda lavur.

Las bacterias vegnan en la serenera cun la chanalisaziun, sa sentan bain e sa multiplitgeschan ina giada il di.
Autur: Yves QuirinUffizi per la natira e l'ambient

Collavuraziun regiunala

Per realisar la nova serenera ARO, per part sin l’areal existent da la veglia serenera Furnatsch, han las vischnancas surdà entant 34 milliuns francs per lavurs. Quai per gronda part ad interpresas indigenas u svizras. La lavur da construcziun è surdada ad ina gruppa da cuminanza da quatter interpresas. Actualmain vegnan furmads ils clutgers da betun per la belma. Fin la fin da quest onn duess la miraglia da betun esser pronta. Proxim onn segua lura il tetg d’atschal da l’edifizi principal e las installaziuns tecnicas cun lingias e chanals.

In grond plazzal da bajegiar

En tut vegn duvrà tenor Markus Berweger, il maina project durant ils proxims dus onns, bler material per il nov implant regiunal. Numnadamain:

  • 3’100 tonnas atschal d’armadira
  • 23’000 cubics betun

Sco ch’il commember da la suprastanza da la ARO, Peter Plebani ha confermà sin il plazzal, proseguan las lavurs tut tenor plan. Quai malgrà il lung temp d’enviern.

Il svilup da l’implant pon ins proseguir grazia a duas webcams via rait. Quai che è capità durant l’emprim onn, ves'ins qua:

Svilup da las lavurs...

RR actualitad 12:00