Dapi in pèr onns cumbatta la societad 'Olympia Bobrun San Murezzan – Schlarigna' cun temperaturas memia autas per construir la via da glatsch da total 1’722 meters. Tuttina ha il chanal da glatsch dad esser pront per la stagiun.
Senza maschinas na vai betg pli
Ils radund 15’000 cubics naiv vegnan perquai producids per gronda part cun chanuns da naiv e transportads cun camiuns sin il lieu. Durant in temp da construcziun da trais enfin quatter emnas realisescha ina squadra spezialisada che deriva dal Tirol dal sid la pista che cuntegna finalmain dasper la naiv er 7’000 fin 8000 cubics aua.
Custs adina pli auts
Per pudair realisar mintg’onn la pista da l’Olympia Bobrun, haja la societad dad investir adina dapli raps. Per cuvrir ils custs dal chanal da glatsch, ha l’organisaziun perquai dumandà quest onn per in credit transitoric dad ulteriurs 200’000 francs. La vischnanca da San Murezzan ha gia approvà la dumonda da sustegn. La radunanza communala da Schlarigna decida ils 12 da december en chaussa.
Ir sur ils cudeschs
Sco quai ch’il directur da l’Olympia-Bobrun San Murezzan Schlarigna, Damian Gianola, ha declerà a RTR, sajan ins actualmain vi da la surelavuraziun dals contracts cun las vischnancas, per adattar quels als imports e basegns dad oz.
Exclusivitad vala la paina
Da na betg pli construir l’unica pista da glatsch natirala dil mund, na vegnia insumma betg en dumonda. Ils custs per ina pista da glatsch artifiziala èn numnadamain bler pli auts, causa l’electricitad ch’i vul per sfradentar il chanal.
L’avertura da la stagiun d’enviern 2016/17 è prevesida per ils 18 da december 2016.
