Siglir tar il cuntegn

Header

cuntegn

Coronavirus In return a chasa nunspetgà

Oriundamain vuleva la dunna da 20 onns giudair e scuvrir il mund durant in onn. Sia ventira aveva cumenzà il settember da l’onn passà en Australia. Previs fiss stà da viagiar ils proxims mais tras l’America dal Sid. La situaziun è dentant daventada adina pli critica per Gianna Duschletta en Guatemala, nua ch’ella ha anc vivì fin avant duas emnas.

Lung viadi....

Cun avair bler dapli contact cun sia famiglia a S-chanf ils davos dis sco durant tut ils emprims mais da ses viadi ensemen, è l’Engiadinaisa sa decidida da bandunar il pajais american uschespert sco pussibel. Er Guatemala aveva annunzià da serrar proximamain tut ils cunfins. Uschia è Gianna Duschletta finalmain arrivada en il Mexico, nua ch'ella ha pudì reservar l’ultima plazza en l’aviun fin ad Amsterdam e suenter a Turitg.

Empè da sgular enavos ils 20 d’avust, sun jau gia uss a chasa: 5 mais pli baud.
Autur: Gianna DuschlettaEngiadinaisa, 20 onns

Gugent fiss l’Engiadinaisa anc restada en l’America Centrala per cuntinuar ses viadi. Dentant sa Gianna Duschletta er, che sia situaziun en in pajais sco Guatemala fiss daventada adina pli difficila sco dunna giuvna ed er anc da pel clera.

Dus cors che battan

Ella saja grata e cuntenta dad esser enavos en patria. Gist en situaziuns sco ussa apprezieschian ins tut ils avantatgs da la Svizra sco la segirtad, l’organisaziun e la nettezza. Gianna Duschletta è persvadida ch’ils pajais ch’ella aveva anc sin ses plan da viadi, sa chattan suenter la crisa da corona segir en in nausch stadi. Perquai ha ella avant da turnar pli tard en l’America, per tut tenor finir ses viadi.

Ils proxims mais ha Gianna Duschletta uss temp per sa preparar sin ses studi a la scol’auta da pedagogia a Berna che cumenza suenter la stad.

RTR actualitad 07:00

Artitgels legids il pli savens

Scrollar a sanestra Scrollar a dretga