En ils tschintg ospitals a Samedan, Scuol, Val Müstair, Bregaglia ed il Puschlav è la situaziun actualmain quietta. Entant ch' ils ospitals a Samedan, Scuol e Poschiavo han intgins pazients staziunars, na datti en la Val Müstair ed en Bregaglia actualmain anc nagins cas ospitalisads. Letgs libers per pazients cun il coronavirus han actualmain anc tut ils tschintg ospitals.
Samedan è l'ospital central
Per ils ospitals è Samedan il lieu central. Tut ils pazients che duvrassan ina tgira intensiva vegnan numnadamain ospitalisads en l'Engiadin’Ota. Perquai vegnan là augmentads ils letgs cun respiraziun artificiala dad actualmain dus sin nov. Tenor Beat Moll, il directur da l’ospital regiunal a Samedan ha quai la consequenza che er il persunal ha da vegnir augmentà. Per mintga letg da respiraziun vul quai tschintg collavuraturs. Grazia ad ina buna collavuraziun cun la Clinica Gut a San Murezzan retschaiva l’ospital da Samedan però agid da spezialists da l’anestesia da la Clinica Gut.