Siglir tar il cuntegn

Header

Il cumandant dal corp da pumpiers, Hans Andersag.
Legenda: Il cumandant dal corp da pumpiers, Hans Andersag. RTR, Georg Luzzi
cuntegn

Corp da pumpiers Scuol a la tschertga da pumpiers

Schebain che far pumpiers è obligatori – la maioritad na vul betg far.

Quels da Scuol ch'èn tranter 20 e 45 e na vulan betg far pumpiers, ston pajar ina taxa da cumpensaziun. Ed ina gronda maioritad da las persunas che avessan da far pumpiers a Scuol pajan quella taxa da cumpensaziun.

Il cader da pumpiers pudess era sfurzar singuls da far pumpiers, ma quai na fiss betg ina soluziun ideala:

Persunas che ston far pumpiers, na fan quai mai cun plain engaschament. Impurtant èsi da chattar persunas che han la motivaziun e l’interess.
Autur: Hans AndersagCumandant dal corp da pumpiers Scuol

Il 2019 èn 125 persunas vegnidas da nov èn l'obligaziun da far pumpiers, vul dir tut quels ch'èn l'onn passà vegnids 20 e quels ch'èn vegnids durant l’onn ad abitar a Scuol. Be quatter da quels fan però activamain pumpiers – tut il rest ha decis da pajar la taxa da 300 francs per onn.

Campagna per chattar pumpiers

Dacurt ha il corp da pumpiers Scuol organisà ina sairada d’infurmaziun a Scuol. La finamira era da cuntanscher persunas che fissan obligadas da far pumpiers, ma pajan la taxa da cumpensaziun. Hans Andersag è cuntent cun il resultat: Radund 30 persunas èn vegnidas a la sairada. Quants che decidan la finala da far pumpiers, vesan ins lura, di il cumandant.

Ils «Pisocins»

A Scuol fan ils pumpiers era ina scolaziun per uffants, numnadamain ils Pisocins. Il cumandant dal corp da pumpiers Pisoc e persvas da quella scolaziun. Uschia restia in u l’auter era en avegnir fidel al corp da pumpiers.

RTR actualitad 12:00

Dapli da Engiadinaavrir la Landingpage

Nach links scrollen Nach rechts scrollen