Corvatsch - Ina mesapipa per il campiunadi mundial da freestyle 2025
L’onn 2025 ha lieu il campiunadi mundial dals freestylers da ski e snowboard en Engiadina. In’occurrenza internaziunala ch'ha lieu en questa furma per l’emprima giada en Svizra. Quest eveniment dovra infrastructura – per exempel ina mesapipa che vegn bajegiada ussa sin il Corvatsch.
Las sfidas da realisar quella mesapipa èn grondas – d'ina vart è la cuntrada en l'inventari federal da las cuntradas e dals monuments natirals d’impurtanza naziunala e per l'autra è la cuntrada sin 2'700 meters sur mar fitg crappusa. Perquai ston vegnir siglientads crappuns, emplenidas foras cun glera e surtut ston ils lavurers dar gas. Cura che l'emprima naiv vegn ston ins chalar da lavurar – almain enfin suenter Pasca.
audio
Il Corvatsch survegn ina mesapipa
03:05 min, ord Actualitad dals 17.10.2022.
Maletg: RTR
laschar ir. Durada: 3 minutas 5 Secundas.
Construir ina mesapipa e proteger la cuntrada – va quai?
40 meters largia, 250 meters lunga e 6,5 meters profunda – quai èn las dimensiuns da la nova mesapipa sin il Corvatsch. Il spezial da quella halfpipe è ch’ella vegn quasi emplantada en la natira.
Avant che las lavurs avevan cumenzà han ils responsabels chavà or las plantas ed ervas e conservà quellas en furma da quadrels da plantas. Quellas plantas ed ervas vegnan cultivadas e cura che las lavurs èn a fin – vegnan quels quadrels da plantas puspè implantads per lung la mesapipa.
1 / 5
Legenda:
Per far ina mesapipa ch'è 40 meters largia, 250 meters lunga e passa 6 meters profunda dovri inqual stgavament.
RTR, Anna Caprez
2 / 5
Legenda:
Il lieu nua che la mesapipa vegn consruida en il territori dal Corvatsch.
RTR, Anna Caprez
3 / 5
Legenda:
Las plantas ed ervas ch'èn vegnidas chavadas or avant che cumenzar cun las lavurs vi da la mesapipa. Suenter vegnan ellas puspè implantadas per lung la halfpipe.
RTR, Anna Caprez
4 / 5
Legenda:
Las plantas ed ervas èn vegnidas messas en salv en in local da l'ustaria dal territori da skis.
RTR, Anna Caprez
5 / 5
Legenda:
La sfida è d'integrar uschè bain sco pussaivel ina gronda mesapipa en la cuntrada e quai cun uschè paucs donns vi dal conturn sco pussaivel.
RTR, Anna Caprez
