I dat era quest onn il CSI a San Murezzan. Quai communitgeschan ils organisaturs dal turbier da chavals CSI. La presidenta dal comité d'organisaziun Leta Joos di ch'ins haja pudì ademplir las pretensiuns da la vischnanca. Il president communal da San Murezzan Sigi Asprion ha ditg percunter envers Radiotelevisiun Svizra Rumantscha RTR che la vischnanca decidia definitivamain en chaussa pir glindesdi ils 25 da fanadur. I saja dentant probabel che la decisiun vegn ad esser a favur dal CSI.
Cundiziuns da la vischnanca
San Murezzan aveva dà da principi la permissiun per il turnier da chavals gia la fin da zercladur. La vischnanca aveva dentant anc pretendì ch'in biro fiduziar examinescha ils contracts cun ils sponsurs ed il contract da leasing per il sablun. Plinavant aveva la vischnanca pretendì che las mesiras da segirezza e da traffic stoppian esser las medemas sco l'onn 2015.
Quest onn in turnier da la pli auta categoria
Il turnier da chavals a San Murezzan è quest onn perfin in turnier da la pli auta categoria cun 5 stailas. L'ediziun da premiera dal 2015 era anc in turnier da 4 stailas. Ussa tutga San Murezzan tar la categoria la pli auta sper turniers sco quels a Turitg, San Galla, Basilea, Losanna e Genevra. Il CSI San Murezzan 2016 dura 5 dis dals 24 enfin ils 28 d'avust. Tenor il directur dal turnier, Beat von Ballmoos, dettia quai ina gronda dumonda per las plazzas da partenza al CSI a San Murezzan. Uschia spetgan ils organisaturs che blers atlets da renum mundial vegnan ad esser a la partenza cun lur chavals.