Siglir tar il cuntegn
Inhalt

Engiadina CSI San Murezzan conferma problems finanzials

La desditga da la concurrenza internaziunala per chavals haja da far cun la mancanza d'in pajament d'in sponsur e cun la midada dal lieu, quai conferma la presidenta Leta Joos.

Leta Joos.
Legenda: Leta Joos vesa la schanza ch'i dat tuttina aunc in CSI a San Murezzan tar 50/50. RTR, Anna Caprez

In dals gronds donaturs n'haja betg pajà quai ch'el aveva empermess. Tenor la presidenta dal comité d'organisaziun Leta Joos, sa tracti da stgars in terz da tut il budget dal CSI San Murezzan. Ils responsabels per l'occurrenza da chavals sajan vegnids a savair ch'i dettia ina procedura penala encunter il sponsur.

Dapli custs tras midada

Ultra da la mancanza da l'import ch'avess pussibilità in'ulteriura ediziun dal CSI San Murezzan, haja er il midament da lieu davent dal prà da Polo, chaschunà custs en pli. Dad ina vart sajan resultads dapli custs d’infrastructura en il nov lieu San Gian dador la vischnanca. Da l’autra haja il sponsur principal reducì massivamain sia contribuziun, quai ord mancanza d'attractivitad dal nov lieu senza vista sin lai e vischnanca, uschia Leta Joos.

Nagins raps, nagina premia

En consequenza da la situaziun actuala da la societad, haja il comité d'organisaziun dal CSI decis da desister da pajar a termin la premia basegnaivla per l’occurrenza a l’Associaziun naziunala. Quella aveva communitgà suenter quai che l'occurrenza saja stritgada dal program annual.

Schanza da 50%

Dal tut na vul Leta Joos dentant anc betg capitular. Sco ella ha confermà envers RTR, sajan ils responsabels actualmain vid tschertgar sponsurs e novas soluziuns. Tenor la presidenta èn las schanzas ch'i dat tuttina anc ina quarta ediziun dal CSI San Murezzan l'0avust da quest onn tar 50/50.

RR novitads 06:00