Siglir tar il cuntegn

Header

cuntegn

Engiadina Cumbat electoral a S-chanf

Gist trais persunas vulan succeder a Duri Campell sin il sez dal president communal da la vischnanca. Peter Angelini, Gian Andrea Bott e Gian Fadri Largiadèr han annunzià lur candidatura uffiziala a la radunanza communala.

Tuts trais candidats possedan experientscha da lavur politica. Uschia è Gian Andrea Bott actualmain vicepresident e commember da la suprastanza communala. Peter Angelini e Gian Fadri Largiadèr èn stads avant in pèr onns en il medem gremi.

Da decider ha S-chanf era davart il vicepresident da la vischnanca, là hai dentant be in candidat. Per la suprastanza communala hai quatter candidats per ils trais sezs en la suprastanza communala. Per il cussegl da scola e la cumissiun da gestiun hai gist tants candidats sco sezs libers. Las elecziuns han lieu a S-chanf per l'emprima giada a l'urna ils 30 d'october 2016.

Lavur a Berna è intensiva

Duri Campell ha demissiunà ses uffizi. Dapi in onn è el uss en il cussegl naziunal a Berna. Da cumbinar ils dus uffizis saja daventà adina pli difficil, aveva Campell declerà cura ch’el aveva annunzià sia demissiun per la fin da l’onn.

Fin uss èn trais candidats en cursa per il presidi. Fin venderdi saira, 7 d’october 2016 pon ins anc inoltrar la candidatura per in dils uffizis communals per il trienni 2017-2019 sin biro communal .

Lubì credit per la serenera Engiadin'Ota

Vinavant ha la radunanza communala da S-chanf decis da dar in credit da 2,53 milliuns francs per la nova serenera d'Engiadin’Ota che duai vegnir fabritgada a S-chanf. Ultra da quai è il contract da collavuraziun cun la vischnanca da Zuoz en ils secturs forestals ed infrastructura vegnì prolungà senza temp da scadenza. Tuttas duas varts pon dentant schliar il contract cun in temp da demissiun dad in onn.

RR novitads 06:00

Artitgels legids il pli savens