La candidatura da Christian Jott Jenny, l’intendant dal Festival da Jazz, é vegnida annunziada pir avant in bun mais ed è stada per blers surprendenta. Oravant tut per il president communal en uffizi, Sigi Asprion.
Dus differents acturs sin il palc
Durant las ultimas emnas èn ils dus candidats sa duellads verbalmain en differentas debattas publicas.
Entant che Sigi Asprion discurra ord experientscha politica dals davos 8 onns, conceda Christian Jott Jenny, ch’el haja fin uss anc pauca experientscha politica, ch’el veglia dentant emprender quai.
Generaziun giuvna
Curt suenter ch’igl era enconuschent che duas persunas candideschan per il presidi, ha ina gruppaziun da giuvens cun il num «La müdeda» organisà in’emprima saira da da discussiun cun Asprion e Jenny. Quai per dar er la generaziun pli giuvna occasiun da far dumondas als candidats. Decisiv tar il cumbat electoral vegn perquai er ad esser sch’ils giuvens van er a vuschar a l’urna u betg.
Insatge nov ubain l’enconuschent
L’effect da simplamain vulair in midament, insatge nov, fiss er pussaivel ils 23 da settember, cun in’elecziun dal candidat giuven en la persuna da Jenny che ha 40 onns. En il cas ch’il candidat Asprion da 59 onns fess la cursa, sa decidess il suveran da San Murezzan per insatge constant enconuschent dapi 8 onns.
RR actualitad 12:00