Cumpromiss a Samedan per vias da bike

Il cussegl communal ha revedì la glista cun scumonds da passagi per bikers sin sendas da viandants. Cun betg scumandar velos sin las vias da l’Alp Clavadatsch, da l’Alp Muntatsch, sur Alpetta fin tar l’Acla Alesch, vul ins porscher maun als bikers.

biker Bild in Lightbox öffnen.

Legenda da maletgs: Viandants e velociclists duain mussar encletga in per l'auter sin las sendas. Keystone

La suprastanza communala da Samedan haja surlavurà anc ina giada las dumondas en connex cun l’utilisaziun da las sendas per viandar tras bikers en la regiun Padella. Quai suenter avair gì in inscunter a la maisa radunda cun pertutgads ed interessads, scriva la vischnanca da Samedan en ina communicaziun.

Chattà soluziun che cuntenta a tuts

Als bikers stettia uschia a disposiziun durant il Panorama Trail Padella era in traject che saja tecnicamain pli pretensius. Dentant renda la vischnanca da Samedan attent, ch’ils scumonds da velos sin las autras sendas resta vinavant. Durant la stagiun da stad 2016 vul ins ramassar experientschas per decider ils proxims pass a reguard adattaziuns e mantegniment da las sendas.

Il cussegl communal da Samedan saja persvas ch’ins possia proteger cun questas duas alternativas era vinavant la senda ecologica «La Senda» e garantir al medem mument ina purschida per viandants e bikers al pè dal Piz Padella.