Gnanc in'emna avant la radunanza communala da Silvaplauna dals 9 da mars 2016 che decida davart l'imposta da 2. abitaziuns hai dà venderdi saira signals da cumpromiss da tuttas varts.
Differentas opiniuns
Durant ina discussiun al podi organisada dals proprietaris da chasas da l'Engiadin'Ota a Puntraschigna èsi sa mussà che in augment da la taxa da cura savess esser in cumpromiss valabel. La represchentanta dals possessurs da 2. abitaziuns ha ditg che l'imposta saja simplamain in affrunt envers ils giasts ils pli fidaivels. L'augment da la taxa da cura fiss percunter in instrument che pertutgass tuts e betg mo ina gruppaziun. Era ils giuvens indigens che han lantschà l'iniziativa che vul impedir l'imposta per 2. abitaziuns vesan in augment moderà da la taxa da cura sco soluziun pussaivla.
1 milliun francs manca
La presidenta communala da Silvaplauna, Claudia Troncana, è anc adina persvadida che l'imposta per 2. abitaziuns fiss in instrument valabel per la vischnanca. Ella savess dentant era viver cun in augment da la taxa da cura che è actualmain bler pli bassa che en vischnancas sco Segl e San Murezzan. In tal augment propona la suprastanza communala per il cas che l'imposta na vegniss betg acceptada. A Silvaplauna manca radund 1 milliun francs en la chascha communala per finanziar projects ed infrastructuras turisticas.
