Per Erica Bivetti eran ils ultims mais anc plain aventuras. Il schaner ha ella anc survegnì il premi da renconuschientscha da la Regiun Malögia per sia ovra da vita artistica. Plinavant è vegnì edì l'emprim cudesch davart ses art ed en il center da commerzi Porta Samedan eran exponids numerus purtrets da l'artista. Sco che ses confamigliars han annunzià en la Posta Ladina da questa gievgia, è Erica Bivetti morta ils 16 d'october 2025 cun 75 onns. Els scrivan vinavant en l'annunzia da mort che l'artista haja pudì sa durmentar a moda paschaivla.
Scuvert l'art pir cun 62 onns
Erica Bivetti è naschida il 1950 e creschida si a Samedan. Ella aveva gia da matta e giuvenila problems cun la sanadad e quai ha a la fin er procurà ch'ella n'ha betg pudì terminar sia scolaziun sco tgirunza a l'Ospital circuital a Samedan. Erica Bivetti aveva però in grond talent da tgirar e guardar d'uffants ed ha durant onns guardà da divers uffants, ma era da glieud attempada ed ha uschia pudì pussibilitar a quella da pudair restar a chasa fin a la mort.
Il grond culp dal destin ha Erica Bivetti lura gì l'onn 2012 cura ch'ella ha gì in pitschen culp da tscharvè. A partir da lura n'era quai betg pli pussaivel per ella da viver suletta en in'abitaziun, uschia che Erica Bivetti è entrada en la cuminanza da lavurar ed abitar da l'Ufficina Samedan. Là ha er cumenzà sia via artistica che è vegnida promovida da l'Ufficina Samedan. Dapi quel accident ha Erica Bivetti numnadamain picturà mintga di e producì ina massa ovras d'art. Erica Bivetti è stada fascinada da colurs, turs e citads ed ha creà surtut motivs da citads sgiagliadas.