Siglir tar il cuntegn

Header

video
Santa Sana project per turissem da sanadad a San Murezzan
Or da Telesguard dals 21.09.2017.
laschar ir. Durada: 2 minutas 41 Secundas.
cuntegn

Engiadina Cuntinuar cun la tradiziun da sanadad a San Murezzan

Dapi settember datti a San Murezzan da nov ina reabilitaziun e prevenziun da malsognas dal cor ambulanta. Cun quella purschida vul la Santasana San Murezzan SA cuntinuar cun ina tradiziun veglia e posiziunar San Murezzan e l'Engiadina en il turissem da sanadad.

Dapi settember datti a San Murezzan da nov ina reabilitaziun e prevenziun da malsognas dal cor ambulanta.

Collavuraziun regiunala cun resursas existentas

La Santasana San Murezzan SA collavura cun differentas instituziuns regiunalas sco per exempel il team da medis dal center medicinal San Murezzan, cun la clinica Gut, l’ospital universitar da Turitg sco era en in’emprima fasa ensemen cun ils hotels Laudinella, Reine Victoria ed il Grand Hotel Kempinski des Bains.

La Santasana San Murezzan SA vegn finanziada privat – ella vul posiziunar da nov l’Engiadina e San Murezzan en la reabilitaziun e prevenziun da malsognas dal cor. I vegnan nizzegiadas capacitads ch'èn gia avant maun sco ils teams da medis e la hotellaria. La purschida sa drizza a pazients internaziunals sco era ad indigens.

En in'emprima fasa è il program adattà per dumondas cardiologicas – previs è, che l’offerta vegn pli vasta uschia che pazients, cun problems dals pulmuns ed auters problems corporals pudessan far ina reabilitaziun a San Murezzan. Ils programs da reabilitaziun èn ambulants – els includan la tgira medicinala, alloschi, proviantaziun, terapias, coaching etc.

Cuntinuar cun ina tradiziun veglia

San Murezzan ha ses num da las funtaunas mineralas. L'enchaschament da la funtauna dal temp da bronz è vegnì chattà en il 19avel tschientaner. Quel enchaschament da la funtauna vegn dotà sin l'onn 1411 avant Cristus – ina scuverta che tutga tar las pli impurtantas da las Alps.

Era il medi da la medischina natirala «Paracelsus» è stà intgantà l’onn 1535 da la forza curativa da las funtaunas a San Murezzan. Silsuenter èn suandads differents medis a Paracelsus ed han visità San Murezzan e la forza curativa è sa derasada sin tut il mund.

Sustegn finanzial dal Chantun Grischun

L'uffizi per economia e turissem vesa il potenzial da la Santasana San Murezzan SA. Il project cumbina sanadad e turissem e po avair in effect positiv sin l'entira regiun da l'Engiadin'Ota. Perquai sustegna il Chantun Grischun il project cun 82'000 francs, en il rom da la nova politica regiunala.

Conturn ideal per la reconvalescenza

San Murezzan cun ses 1856 meters sur mar e la regiun da l'Engiadin'Ota duess esser il conturn ideal per la reconvalescenza.

Hans Peter Danuser, commember dal cussegl d'administraziun «Santasana San Murezzan SA» prenda posiziun tar las dumondas suandantas:

Per promover la nova purschida da Santasana San Murezzan SA han 5 sunatibas concertà sin 3700 meters sur mar. L'intent oriund fiss stà da sunar la tiba sin 4049 meters sur mar - sin il Piz Bernina. La naiv ed il vent nun han però laschà muntar als sunatibas sin il Piz Bernina. Perquai han els suna in vischinanza da la chamona Marco e Rosa sin var 3700 meters sur mar.

TR Telesguard 17:40

Artitgels legids il pli savens