En ina conferenza video han ils presidents dals clubs da curling in Engiadina tratg ina decisiun communabla: Ils gronds turniers sco la Coppa Romana Silvaplana (76 teams), il Gianda Platta Segl, il Samedan Trophy ed en l'Engiadina Bassa il Grond Premis Scuol vegnan definitivamain spustads sin il proxim enviern.
La situaziun saja memia malsegira per pudair organisar e manar tras in turnier senza difficultads, hai num en la communicaziun a las medias.
Dus events èn anc averts
Anc betg decis èsi sch'il Jackson-Cup a San Murezzan vegn stritgà. Ils da San Murezzan vulan anc spetgar cun la decisiun enfin la fin da december. E tar la 50avla Mastranza Svizra openair previsas a Schlarigna, sto anc decider l’associaziun naziunala co vinavant.
Tut ils clubs da curling sa concentreschan ussa sin l’organisaziun da las occurrenzas che vegnan ad avair lieu l'auter enviern.