Dapi 62 onns datti il turnier da curling da la scossa en Engiadina. La scossa è in’uniun da curling nua che be umens sur 60 onns pon daventar commembers. Ils pli giuvens èn ils vadels – ils auters èn las trimas – pia ina scossa muaglia che gioga curling.
Curling – in sport per tut las vegliadetgnas
Al turnier annual han quest onn cumbattì 12 teams sin il glatsch a Schlarigna. Entant ch’il participant il pli giuven ha 60 onns, ha il pli attempà passa 80 onns. Memia vegl per giugar curling na sajan ins mai, èn ils curlists persvadids.
Quest sport pon ins far anc ditg. Ins sto simplamain adina giugar vinavant.
Adattar il stil
Tar il turnier tradiziunal da la scossa na vai betg per la precisiun cumpletta e per gudagnar, mabain en emprima lingia per la cumpagnia ed il plaschair vi dal giugar. Uschia na datti era betg limitaziuns per quels che n'èn betg pli uschè bain en chomma. Per betg pli stuair ir en schanuglia, po numnadamain vegnir tratg a niz in bastun u la scua per stumplar il crap. Il turnier da la scossa è pia dapli ch'in turnier da curling usità. El duai dar l’occasiun a mintgin da pudair passentar in di da seniors in pau pli spezial.