La societad pendicularas Corvatsch ha preschentà als acziunaris il rendaquint 2014/15. Quel serra, malgrà frequenzas pli bassas, cun in gudogn da 88’000 francs. Quest import vegn adì e transportà sin il proxim onn da gestiun cun in minus da 556’939 francs.
Damain mezs liquids
La liquiditad da la societad Corvatsch è sa diminuida per 2,23 milliuns francs. Quai surtut entras las investiziuns da 4,979 milliuns francs che cuntegnan: la sutgera Mandra, prestaziuns preliminaras per la nova sutgera Curtinella, per differentas pistas e l’ennavada da questas cun novs implants.
Glisch verda per nova sutgera Curtinella
Dapi ils 18 d’avrigl 2016 è la concessiun per ina nova sutgera colliabla da 6 valabla, uschia che la Corvatsch SA po realisar questa stad il nov implant. Sco quai ch’il maina-gestiun Markus Moser ha declerà a la radunanza generala sajan er las ulteriuras investiziuns planisadas – en tut 27 milliuns francs - sin buna via.
Spetgar sin resposta da Cuira
Cun brama vegnia uss spetgada posta da la regenza grischuna per proseguir cun il project d’in nov hotel tar la staziun da val Furtschellas. Ins possia far quint ch’il chantun decidia durant las proximas 4 emnas en chaussa.
Ultra da l’approvaziun dal rendaquint, han ils 169 acziunaris preschents reelegì il cussegl administrativ en globo per in ulteriur onn.