Schon sco pop è l'um da Sent stà fascinà da la glina. Per che Men Jon Schmidt chala dad observar la glina e dorma finalmain, avevan ses geniturs adina stuì trair via ils sumbrivals. Cura che ses collegas avevan dà balla aveva el observà il firmament.
l na saveva betg spetgar enfin ils 21 da fanadur (en ils Stadis Unids anc ils 20 da fanadur) cura ch'el ha pudì tadlar l'entira tschentada sin la glina live en il radio.
L'effect ch'ins ha pudì sa partcipar directamain a quest eveniment: quai è insatge che jau na vegn mai ad emblidar!
Sco mattet ha el scrit brevs als pioniers ch'han lavurà tar la NASA, sco al inschigner da rachetas Werner von Braun. Sco resposta ha el survegnì documents, broschuras e fotografias. Cun 15 onns è el – suenter lungas discussiuns cun ses geniturs – stà en America per guardar il start da la racheta Saturn V.
Da la passiun a la professiun
Men Jon Schmidt ha fatg l'emprendissadi sco dissegnader da construcziun auta ed ha lavurà ditg sin questa professiun. El ha dentant mai chalà da s'interessar per l'astronautica. Bainspert è el vegnì expert per dumondas da astronomia ed astronautica tar la SRF e RTR.
2001 ha el lura entschet a lavurar tar «Fisba», ina firma che fa objectivs, lentas ed auters products per l'aviatica e l'astronautica. Actualmain tegna el referats e fa guidas en il museum da la natira a Son Gagl, nua che blers da ses exponats en mess or.
TR sil punct 17:40