Cumenzà ha tut sco hobi. L’onn 2009 ha Daniel Käslin fat per l’emprima giada biera. Quai a chasa en cuschina. Sis onns pli tard ha el uss ina bieraria che po producir var 2'500 buttiglias biera per di.
L’engrondiment professiunalisescha
En la bieraria veglia era tut magari pitschen - differents pass da lavur han ins stuì far quasi al medem lieu. Uss è tut pli grond e duas maschinas surpiglian lavurs impurtantas. Ina maschina embuttigliescha e l’autra tatga si las etichettas. Il rest da las lavurs restan lavurs a maun.
La bieraria la pli auta da la Svizra
Era scha la bieraria è en cumparegliaziun cun las autras anc magari pitschna – ella ha sias spezialitads. Ella è la pli auta da l’entira Svizra. L’aua che vegn duvrada è da Puntraschigna e quella saja ina da las meglras.
La schelta è vasta
L’emprima biera era la Bernina – fin il di dad oz producescha la bieraria Engiadina sis differentas bieras, da cleras enfin stgiras. Per il producent da biera Daniel Käslin èsi impurtant ch’els possian reagir sin giavischs e gusts dals consuments.
