Bun 120 persunas èn sa radunadas en la sala da l’hotel Bernina a Samedan per festegiar il giubileum da la secziun e quai al medem di ed al medem lieu. Sper ina tschaina cuminaivla han ils preschents surtut pudì giudair preschentaziuns da fotografias e dias cun regurdientschas da las numerusas turas ed excursiun dals ultims onns.
Vin, cudesch e binderas per il giubileum
En occasiun dal giubileum ha la secziun laschà producir in vin da giubileum. Per regurdar als ultims 125 onns survegn mintga commember dal club in cudesch illustrà cun fotografias text e graficas davart l’istorgia dal CAS Bernina. Plinavant vegnan bainbaud a sventular binderas cun il logo da giubileum davant las 5 chamonas dal CAS Bernina.
La secziun CAS Bernina era vegnida fundada ils 1 da favrer 1891 a Samedan. Iniziant da la fundaziun è stat il reverenda ed emprim directur da cura da San Murezzan Camill Hoffmann.
Ensemen cun 28 umens ha gì lieu la sesida da constituziun en l’hotel Bernina a Samedan.
Commembranza be per glieud bainstanta
Ils fundaturs da la secziun appartegnevan tar la classa sociala superiura. La populaziun engiadinaisa "normala" n’aveva nagina pussaivladad da far grond sport en las muntognas. La lavur da mintgadi era gia dira avunda. Sin ils pizs gieva la glieud be per ir a chatscha u per bandunar la val.
Grond svilup durant ils ultims 125 onns
L’Engiadin’Ota ed er il Puschlav che appartegnan tar la secziun dal CAS Bernina èn sa midadas e sa sviluppadas ils ultims onns marcantamain. Quai a reguard il turissem, il sectur da fabrica ed er las colliaziuns per il traffic èn daventadas bler pli curtas. Uschia han ins er dapli temp per giudair la vita en las muntognas.
Il Club Alpin Svizzer Bernina ha entant passa 1’500 commembers, e posseda en tut 5 chamonas: Es-cha, Kesch, Jenatsch, Tschierva, Boval e Saoseo.