Tgi che pensa vi d’in batger vesa probablamain in um corpulent, grobulan e cun fatscha seriusa. Tanya Giovanoli è gist il cuntrari. Ella ha encletga per vegetarians, na ha dentant betg cumpassiun cun ils animals.
Bab, bazegner e tat e probablamain era il bab da quel eran gia batgers a Malögia. Ella è la prima dunna en questa dinastia da batgers. Sco dunna saja grev. I dovra fitg blera forza u strategias novas per purtar in mez portg. Ella na sa numna betg simplamain batgera, ella saja ina «meat designra», ina che furma charn.
Plirs onns ha ella bandunà las muntognas e sia professiun da batger. Ella ha lavurà en in mund urban, en la branscha da moda. Avant dus onns è ella puspè turnada en Grischun e tar la charn.
Cuntenta as resta sch’ins fa insatge che fa senn.
Cun quai na manegia ella betg il cuppar animals – ma il tractar cun respect l'animal, ed il far insatge bun or da tut las parts da quel.
Quai è il motiv ch'ella ha uss sia atgna batgaria cun atgnas spezialitads en l’anteriur hotel dal chastè a Tumein.
