Siglir tar il cuntegn
Inhalt

Engiadina Damain traffic per il center dal vitg Müstair

La regenza grischuna ha approvà in project per in sviament a Müstair. La via Prövis vegn da nov signalisada sco via principala e la via chantunala actuala en il center dal vitg, duai vegnir surdada a la vischnanca.

Legende: Audio Saira: Finalmain in sviament per Müstair abspielen. Laufzeit 02:39 Minuten.
02:39 min, Actualitad dals 18.10.2018.

La via dal Pass dal Fuorn è l'unica colliaziun da la Val Müstair cun l'Engiadina Bassa e cun il Tirol dal Sid. Ella maina tras il center stretg dal vitg da Müstair.

Perquai giavischa Müstair gia dapi daditg in sviament. Uss ha la regenza approvà in project che prevesa da barattar la via chantunala tras il vitg cun la via Prövis che maina circa 50 meters sut il vitg ora. Questa via duai vegnir classifitgada da nov sco via principala e vegnir fabritgada ora per 5,5 milliuns francs.

La via vegn duvrada gia oz tant dal traffic local sco er dal traffic pesant sco ruta per guntgir la traversada da Müstair stretga e nunsurvesaivla.

Il project en detagl

Cun dus projects da via duain la via Prövis ed il traject da colliaziun da la via dal Pass dal Fuorn vegnir engrondids:

  • cun ina nova traversada cun insla d'amez sin autezza da la sbuccada da la senda da scola
  • il sectur da la sbuccada da la via Prövis e l'entrada e sortida da la plazza da parcar vegnan concepids da nov

Plinavant duain vegnir allontanads la fermada per l'auto da posta ed il stabiliment da tualettas. E dad omaduas varts da la via duaja dar in in trottuar per lung da la via chantunala. Gist attatg al project chantunal vul la vischnanca da la Val Müstair construir ina nova fermada per l'auto da posta davant la claustra, in nov stabiliment da tualettas e plazzas da parcar.

Lunga preistorgia

Suenter la fusiun ha la nova vischnanca dumandà il 2010 il chantun da barattar la via chantunala tras vischnanca cun la via Prövis che dovra urgentamain ina sanaziun. Il 2013 ha il suveran lura approvà quest project. Pervi da recurs n'è quel dentant betg vegnì realisà.

Uss è quest project oriund vegnì surlavurà ed ha survegnì l'approvaziun da la regenza. Sch'i na dat nagins recurs duain las lavurs cumenzar la primavaira proxima. L'avertura è lura previsa il pli baud l'onn 2020.

RR novitads 09:00+