Engiadina - Damian Gianola è il nov manader da l'Olympia Bobrun
Suenter 10 onns datti in midament a la testa da l'Olympia Bobrun San Murezzan - Schlarigna. Roberto Triulzi aveva demissiunà il matg da quest onn. La raschun per la separaziun era tenor ina communicaziun da l'organisaziun las opiniuns differentas davart la direcziun futura dal manaschi.
Damian Gianola ha 37 onns ed era fin uss il manader operativ da l'Olympia Bobrun San Murezzan. El lavura dapi il 2009 per l'organisaziun ed ha dapi il matg da quest onn schon manà ad interim il manaschi.
Tenor la communicaziun da l'organisaziun è Gianola uss vegnì elegì or da passa 12 persunas per il post sco manader da fatschenta. El saja bainvesì tar atlets, trenaders ed organisaziuns da tut il mund. Sco anteriur atlet da skeleton e collavuratur dal manaschi enconuschia el il manaschi da pliras varts.
