Passa 4 uras avant che la cursa cumenza s'inscuntran ils passa 50 voluntaris a Salastrains. Els èn responsabels da glischnar davent la naiv da la lingia optimala, quella nua che las curridras passan.
Il schef dad els è dapi passa 20 onns Daniel Godli da Puntraschigna. La pli gronda sfida è per el da scolar mintgin da ses gidanters entaifer curt temp. Blers dad els cumenzan mo in pèr dis avant la cursa cun questa lavur voluntaria.
La gronda sfida è da chattar avunda glieud e da declerar la lavur entaifer mo in pèr dis
Cun l'experientscha d tut quests onns che Daniel Godli fa gia questa lavur, sa el precis, sco ch’el ha da scolar sia squadra per che tut funcziuna, sco quai ch’i sto.
Lingia optimala
Impurtant è curt avant la cursa da glischnar or tut la naiv or da la lingia optimala. Quella lingia è quella, nua che las atletas passan durant la cursa. Tenor Daniel Godli n’è quai betg in problem da chattar quella lingia. El e sia squadra guardan da glischnar or la naiv ch’i dat ina lingia largia – da var 10 fin 15 meters. Punct a las 10:00 ha quella dad esser pronta, uschia che las meglras atletas dal mund pon far ina cursa sin ina pista perfetga.
RTR, actualitad 6:00